کردارِ صحابہ اور تاریخ نگاری

اگرچہ صحابہ کرام کے اختلافات نیک نیتی پر مبنی تھے اور ان کا مقصد اصلاحِ احوال تھا مگر منافقین نے اپنا دنیوی مقصد حاصل کرنے کے لیے ان اختلافات کو ایسے رنگ میں پیش کیا اور اپنی تائید میں ایسی ایسی روایات وضع کیں کہ صحابہ کرام کو کمینہ خصلت اور دنیا پرست قسم کے گھٹیا لوگوں کی صف میں لا کر کھڑا کر دیا۔
ان بہتان تراشیوں سے ہماری تاریخ کی کتابیں بھری پڑی ہیں۔ اس لیے جو شخص بھی ان کتبِ تاریخ کو (جن کو اصلاً تاریخ نہیں مجموعۂ روایات کہنا چاہئے) آنکھیں بند کر کے مدار علیہ بنائے گا ، اُس کا ٹھوکر کھانا یقینی ہے اور دانستہ یا نادانستہ طور پر اس گورکھ دھندے میں الجھ کر رہ جائے گا اور کسی بھی فریق سے انصاف نہیں کر سکے گا۔

یہ قیاس غلط ہے کہ :
تاریخ نگاری کے لیے چھان بین کی ضرورت نہیں کیونکہ تاریخ کوئی حدیث نہیں کہ اس پر حرام و حلال کی بنیاد ہو۔

حالانکہ حقیقت اس کے قطعاً برعکس ہے !
تاریخ کا وہ حصہ جس کا تعلق صحابہ کرام کے اقوال و افعال سے ہے اُتنا ہی اہم ہے جتنی حدیث۔ کیونکہ اگر صحابہ (رضوان اللہ عنہم اجمعین) کی شخصیت مجروح ہوتی ہے تو دین کی بنیاد بھی قائم نہیں رہتی۔ کیونکہ دین ہمیں انہی نفوسِ قدسیہ کے توسط سے ملا۔ اگرچہ دین کا اصل ماخذ قرآن حکیم محفوظ ہے اور اس میں کسی قسم کی تحریف کا احتمال نہیں۔
لیکن نبی اکرم صلی اللہ علیہ وسلم کے اقوال و افعال اور پھر صحابہ کرام رضی اللہ عنہم کا عمل و کردار قرآن حکیم کی عملی تفسیر کرتے ہیں۔ اگر ہم تاریخ کے مطالعے سے کسی صحابی کے متعلق اس نتیجہ پر پہنچتے ہیں کہ وہ نفس پرست اور دنیا طلب تھا اور دنیوی مفاد کے لیے احکامِ شرعی کی پرواہ نہیں کرتا تھا تو یہ کیسے ممکن ہے کہ اس کی روایتِ حدیث کو قبول کیا جائے اور مدارِ عمل بنایا جائے؟

یہ مفروضہ ہی سرے سے غلط ہے کہ ایسے لوگ جو ذاتی اور دنیوی مفادات کو دینی احکام پر ترجیح دیتے ہوں ، روایتِ حدیث کے معاملے میں کوئی خطا نہیں کر سکتے۔ بلکہ اغلب یہ ہے کہ ایسے لوگ حدیث کو بھی مفاد پرستی کے لیے آلۂ کار بنائیں۔

ہم احادیث کو اسی صورت میں مدارِ عمل بنا سکتے ہیں جب ہمیں یہ یقین ہو کہ ان کے اولین راوی بہمہ وجوہ صادق و عادل تھے۔
یہ دو رنگی کسی طرح بھی قابل تسلیم نہیں ہو سکتی کہ بعض صحابہ دنیاوی معاملات میں تو غیر عادل اور خائن تھے ، مگر روایتِ حدیث میں صادق و امین تھے۔
اس لیے ضروری ہے کہ جس طرح روایتِ حدیث کے سلسلے میں چھان بین سے کام لیا گیا ہے ، اسی طرح تاریخ کی ان روایات کے متعلق بھی اسی طرح چھان بین سے کام لیا جائے جن کا تعلق صحابۂ کرام کے "مشاجرات" سے ہے تاکہ حقیقت نکھر کر کے سامنے آ سکے۔

مولانا مودودی صاحب (رحمۃ اللہ) کا یہ کہنا کہ :
اگر تاریخ کے معاملے میں بھی تحقیق کا وہی طریق اختیار کیا جائے جو احادیث کے سلسلے میں اختیار کیا گیا تھا تو ہماری تاریخ کا 90 فیصد حصہ دریا برد کرنا پڑے گا۔

اگر حقیقت یہی ہے کہ ہماری تاریخ کی نوّے فیصد روایات محض کذب و افسانہ ہیں تو ان کو دریا بُرد کر دینا کوئی بری بات نہیں !!
کیونکہ ۔۔۔ ع

ایں دفتر بےمعنی غرق مئے ناب اولیٰ


اقتباس از مضمون : جناب وارث سرہندی ۔ بحوالہ : خلافت و ملوکیت کی تاریخی و شرعی حیثیت